Cantar de Mío Cid. Folio 72v

Quebraron le las çinchas ninguna nol ouo pro
Por la copla del cauallo en tierra lo echo
Assi lo tenien las yentes que mal ferido es de muert
El dexo la lança e al espada metio mano
Quando lo vio ferrangoçalez conuuo a tizon
Antes que el colpe esperasse dixo vençudo so
Atorgaron gelo los fieles pero vermuez le dexo

CLI

Martin antolinez e diego gonçalez firieron se delas lanças
Tales fueron los colpes que les quebraron amas
Martin antolinez mano metio al espada
Relumbra tod el campo tanto es linpia e clara
Diol vn colpe de trauiessol tomaua
El casco de somo apart gelo echaua
Las moncluras del yelmo todas gelas cortaua
Alla leuo el almofar fata la cofia legaua
La cofia e el almofar todo gelo leuaua
Raxol los pelos dela cabeça bien ala carne legaua
Lo vno cayo enel campo e lo al suso fincaua
Quando este colpe a ferido colada la preçiada
Vio diego gonçalez que no escaparie con el alma
Boluio la Rienda al cauallo por tornasse de cara
Essora martin antolinez Reçibiol con el espada
Vn colpel dio de lano con lo agudo nol tomaua
Diagonçalez espada tiene en mano mas no la
Ensayaua