Cantar de Mío Cid. Folio 72r

Desi vinien los de myo çid alos yfantes de carrion
E llos yfantes de carrion alos del campeador
Cada vno dellos mientes tiene al so
Abraçan los escudos delant los coraçones
Abaxan las lanças abueltas con los pendones
Enclinauan las caras sobre los arzones
Batien los cauallos con los espolones
Tembrar querie la tierra dond eran mouedores
Cada vno dellos mientes tiene al so
Todos tres por tres ya juntados son
Cuedan se que essora cadran muertos los que estan aderredor
Pero vermuez el que antes Rebto
Con ferran gonçalez de cara se junto
Firiensse en los escudos sin todo pauor
Ferrangoçalez a pero vermuez el escudol passo
Prisol en vazio en carne nol tomo
Bien en dos logares el astil le quebro
Firme estido pero vermuez por esso nos encamo
Vn colpe Reçibiera mas otro firio
Quebranto la boca del escudo a part gela echo
Passo gelo todo que nada nol valio
Metiol la lança por los pechos que nada nol valio
Tres dobles de loriga tenie fernando aquestol presto
Las dos le desmanchan e la terçera finco
El belmez con la camisa e con la guarnizon
De dentro en la carne vna mano gela metio
Por la boca afuera la sangrel salio