Cantar de Mío Cid. Folio 73r

Esora el yfante tan grandes vozes daua
Valme dios glorioso sennor e curiam deste espada
El cauallo asorrienda e mesurandol del espada
Sacol del moion martin antoljnez en el campo fincaua
Essora dixo el Rey venid uos a mi companna
Por quanto auedes fecho vençida auedes esta batalla
Otorgan gelo los fieles que dize verdadera palabra

CLII

Los dos han arrancado djreuos de muno gustioz
Con assur gonçalez commo se adobo
Firienssen en los escudos vnos tan grandes colpes
Assur gonçalez furçudo e de valor
Firio enel escudo a don muno gustioz
Tras el escudo falsso ge la guarnizon
En vazio fue la lança ca en carne nol tomo
Este colpe fecho otro dio muno gustioz
Tras el escudo falsso ge la guarnizon
Por medio de la bloca del escudol quebranto
Nol pudo guarir falsso ge la guarnizon
A part le priso que non cabel coraçon
Metiol por la carne adentro la lança conel pendon
Dela otra part vna braça gela echo
Con el dio vna tuerta dela siella lo encamo
Al tirar dela lança en tierra lo echo
Vermeio salio el astil e la lança e el pendon
Todos se cuedan que ferido es de muert
La lança Recombro e sobrel se paro