Cantar de Mío Cid. Folio 48v

El debdo que a cada vno a conplir sera
Verlo hemos con dios e con la uuestra auze
Dixo myo çid ayamos mas de vagar
Afeuos el obispo don iheronimo muy bien armado
Parauas delant al campeador siempre con la buen auze
Oy uos dix la missa de santa trinidade
Por esso sali de mi tierra e vin uos buscar
Por sabor que auia de algun moro matar
Mi orden e mis manos querria las ondrar
E a estas feridas yo quiero yr delant
Pendon trayo a corcas e armas de sennal
Si plogiesse a dios querria las ensayar
Myo coraçon que pudiesse folgar
E uos myo çid de mi mas uos pagar
Si este amor non feches yo de uos me quiero quitar
Essora dixo myo çid lo que uos queredes plaz me
Afe los moros a oio yd los ensayar
Nos daquent veremos commo lidia el abbat

CXVII

El obispo don iheronimo priso a espolonada
E yua los ferir a cabo del albergada
Por la su ventura e dios quel amaua
Alos primeros colpes dos moros mataua dela lança
El astil a quebrado e metio mano al espada
Ensayauas el obispo dios que bien lidiaua
Dos mato con lança e .v. con el espada