Cantar de Mío Cid. Folio 49r

Los moros son muchos derredor le çercauan
Dauan le grandes colpes mas nol falssan las armas
El que en buen ora nasco los oios le fincaua
Enbraço el escudo e abaxo el asta
Aguijo a bauieca el cauallo que bien anda
Hyua los ferir de coraçon e de alma
En las azes primeras el campeador entraua
Abatio a .vij. e a .iiij. mataua
Plogo a dios aquesta fue el arrancada
Myo çid con los suyos cae en alcança
Veriedes quebrar tantas cuerdas e arrancar se las estacas
E acostar se los tendales con huebras eran tantas
Los de myo çid alos de bucar delas tiendas los sacan

CXVIII

Sacan los delas tiendas caen los en alcaz
Tanto braço con loriga veriedes caer a part
Tantas cabeças con yelmos que por el campo caen
Cauallos sin duenos salir a todas partes
.vij. migeros conplidos duro el segudar
Myo çid al Rey bucar cayol en alcaz
Aca torna bucar venist dalent mar
Verte as con el çid el de la barba grant
Saludar nos hemos amos e taiaremos amistas
Respuso bucar al çid cofonda dios tal amistad
El espada tienes desnuda en la mano e veot aguijar
Asi commo semeia en mi la quieres ensayar