Cantar de Mío Cid. Folio 49v

Mas si el cauallo non estropieça o comigo non caye
Non te iuntaras comigo fata dentro en la mar
Aqui Respuso myo çid esto non sera verdad
Buen cauallo tiene bucar e grandes saltos faz
Mas bauieca el de mio çid alcançando lo va
Alcançolo el çid a bucar a tres braças del mar
Arriba alço colada vn grant colpe dadol ha
Las carbonclas del yelmo tollidas gela ha
Cortol el yelmo e librado todo lo hal
Fata la çintura el espada legado ha
Mato a bucar al Rey de alen mar
E gano a tizon que mill marcos doro val
Vençio la batalla marauillosa e grant
Aquis ondro myo çid e quantos conel son

CXIX

Con estas ganançias yas yuan tornando
Sabet todos de firme Robauan el campo
Alas tiendas eran legados do estaua
El que en buen ora nasco
Myo çid Ruy diaz el campeador contado
Con dos espadas que el preçiaua algo
Por la matança vinia tan priuado
La cara fronzida e almofar soltado
Cofia sobre los pelos fronzida della ya quanto
Algo vie myo çid delo que era pagado
Alço sos oios esteua adelant catando