Cantar de Mío Cid. Folio 45r

CIX

Besaron le las manos la mugier e las fijas amas
E todas las duennas que las siruen
Grado al criador e a uos çid barba velida
Todo lo que uos feches es de buena guisa
Non seran menguadas en todos uuestros dias
Quando uos nos casaredes bien seremos Ricas

CX

Mugier donna ximena grado al criador
A uos digo mis fijas don eluira e donna sol
Deste uuestro casamiento creçremos en onor
Mas bien sabet verdad que non lo leuante yo
Pedidas uos ha e Rogadas el myo sennor alfonsso
A tan firme mientre e de todo coraçon
Que yo nulla cosa nol sope dezir de no
Metiuos en sus manos fijas amas a dos
Bien melo creades que el uos casa ca non yo

CXI

Penssaron de adobar essora el palaçio
Por el suelo e suso tan bien encortinado
Tanta porpola e tanto xamed e tanto panno preciado
Sabor abriedes de ser e de comer enel palaçio
Todos sus caualleros a priessa son iuntados
Por los yffantes de carrion essora enbiaron
Caualgan los yffantes adelant adelinauan al palaçio
Con buenas vestiduras e fuerte mientre adobados
De pie e a sabor dios que quedos entraron