Cantar de Mío Cid. Folio 45v

Reçibio los myo çid con todos sus vasallos
Ael e e a ssu mugier delant sele omillaron
E yuan posar en vn preçioso escanno
Todos los de myo çid tan bien son acordados
Estan parando mientes al que en buen ora nasco
El campeador en pie es leuantado
Pues que a fazer lo auemos por que lo ymos tardando
Venit aca albarfanez el que yo quiero e amo
Affe amas mis fijas metolas en uuestra mano
Sabedes que al Rey assi gelo he mandado
No lo quiero falir por nada de quanto a y parado
Alos yfantes de carrion dad las con uuestra mano
E prendan bendiçiones e vayamos Recabdando
Estoz dixo minaya esto fare yo de grado
Leuantan se derechas e metiogelas en mano
Alos yfantes de carrion minaya va fablando
Afeuos delant minaya amos sodes hermanos
Por mano del Rey alfonsso que a mi lo ouo mandado
Douos estas duennas amas son fijas dalgo
Que las tomassedes por mugieres a ondra e a recabdo
Amos las Reçiben damor e de grado
A myo çid e a su mugier van besar la mano
Quando ouieron aquesto fecho salieron del palaçio
Pora santa Maria a priessa adelinnando