Cantar de Mío Cid. Folio 21r

Diçe de vna sierra e legaua a vn val
Del conde don Remont venido les mensaie
Myo çid quando lo oyo enbio pora alla
Digades al conde non lo tenga a mal
Delo so non lieuo nada dexem yr en paz
Respuso el conde esto non sera verdad
Lo de antes e de agora todom lo pechara
Sabra el salido a quien vino desondrar
Tornos el mandadero quanto pudo mas
Essora lo connosçe mio çid el de biuar
Que a menos de batalla nos pueden den quitar

LVII

Ya caualleros a part fazed la ganançia
Apriessa uos guarnid e metedos en las armas
El conde don Remont dar nos ha grant batalla
De moros e de xristianos gentes trae sobeianas
A menos de batalla non nos dexarie por nada
Pues adellant yran tras nos aqui sea la batalla
Apretad los cauallos e bistades las armas
Ellos vienen cuesta yuso e todos trahen calças
Elas siellas coçeras e las çinchas amoiadas
Nos caualgaremos siellas gallegas e huesas sobre calças
Çiento caualleros deuemos vençer aquelas mesnadas
Antes que ellos legen a lanno presentemos les las lanças
Por vno que firgades tres siellas yran vazias
Vera remont verengel tras quien vino en alcança
Oy en este pinar de teuar por toler me la ganançia