Cantar de Mío Cid. Folio 20v

Cras ala mannana penssemos de caualgar
Dexat estas posadas e yremos adelant
Estonçes se mudo el çid al puerto de alucat
Dent corre myo çid a huesca e a mont aluan
En aquessa corrida .x. dias ouieron a morar
Fueron los mandados a todas partes
Que el salido de castiella asi los trae tan mal

LV

Los mandados son ydos a todas partes
Legaron las nueuas al conde de barçilona
Que myo çid Ruy diaz quel corrie la tierra toda
Ouo grand pesar e touos lo a grand fonta

LVI

El conde es muy folon e dixo vna vanidat
Grandes tuertos me tiene myo çid el de biuar
Dentro en mi cort tuerto me touo grand
Firiom el sobrino e non lo enmendo mas
Agora correm las tierras que en mi npara estan
Non lo desafie nil torne enemistad
Mas quando el melo busca yr gelo he yo demandar
Grandes son los poderes e a priessa se uan legando
Gentes se le alegan grandes entre moros e xristianos
Adelinan tras myo çid el bueno de biuar
Tres dias e dos noches penssaron de andar
Alcançaron a myo çid en teuar e el pinar
Asi viene esforçado que el conde a manos sele cuydo tomar
Myo çid don Rodrigo trae grand ganançia