Cantar de Mío Cid. Folio 20r

Grado a dios e alas sus vertudes santas
Mientra uos visquieredes bien me yra a mj minaya

L

Dios commo fue alegre todo aquel fonssado
Que minaya albarfanez assi era legado
Diziendo les saludes de primos e de hermanos
E de sus compannas aquelas que auien dexadas

LI

Dios commo es alegre la barba velida
Que albarfanez pago las mill missas
E quel dixo saludes de su mugier e de sus fijas
Dios commo fue el çid pagado e fizo grant alegria
Ya albarfanez biuades muchos dias

LII

Non lo tardo el que en buen ora nasco
Tierras dalcaniz negras las va parando
E a derredor todo lo va preando
Al terçer dia don yxo y es tornado

LIII

Hya va el mandado por las tierras todas
Pesando va alos de monçon e alos de huesca
Por que dan parias plaze alos de saragoça
De myo çid Ruy diaz que non temien ninguna fonta

LIV

Con estas ganançias ala posada tornando se uan
Todos son alegres ganançias traen grandes
Plogo a myo çid e mucho a albarfanez
Sonrrisos el caboso que non lo pudo endurar
Hya caualleros dezir uos he la verdad
Qui en vn logar mora siempre lo so puede menguar