Cantar de Mío Cid. Folio 19v

XLIX

Quiero uos dezir del que en buen ora nasco e çinxo espada
Aquel poyo enel priso posada
Mientra que sea el pueblo de moros e dela yente xristiana
El poyo de myo çid asil diran por carta
Estando alli mucha tierra preaua
El de rio martin todo lo metio en paria
A saragoça sus nueuas legauan
Non plaze alos moros firme mientre les pesaua
Ali souo mio çid conplidas .x.v. semanas
Quando vio el caboso que se tardaua minaya
Con todas sus yentes fizo vna trasnochada
Dexo el poyo todo lo desenparaua
Alen de teruel don Rodrigo passaua
Enel pinar de teuar don Roy diaz posaua
Todas essas tierras todas las preaua
A saragoça metuda la en paria
Quando esto fecho ouo a cabo de tres semanas
De castiella venido es minaya
Dozientos con el que todos çinen espadas
Non son en cuenta sabet las peonnadas
Quando vio myo çid asomar a minaya
El cauallo corriendo ualo abraçar sin falla
Beso le la boca e los oios dela cara
Todo gelo dize que nol encubre nada
El campeador fermoso sonrrisaua