Cantar de Mío Cid. Folio 71r

Si buenas las tenedes pro abran a uos
Otro si faran alos del canpeador
Leuad e salid al campo yfantes de carrion
Huebos vos es que lidiedes a guisa de varones
Que nada non mancara por los del campeador
Si del campo bien salides grand ondra auredes vos
E ssi fueres vençidos non rebtedes a nos
Ca todos lo saben que lo buscastes vos
Hya se uan Repintiendo yfantes de carrion
Delo que auien fecho mucho Repisos son
No lo querrien auer fecho por quanto ha en carrion
Todos tres son armados los del campeador
Hyua los ver el Rey don alfonsso
Dixieron los del campeador
Besamos vos las manos commo a Rey e a sennor
Que fiel seades oy dellos e de nos
A derecho nos valed a ningun tuerto no
Aqui tienen su vando los yfantes de carrion
Non sabemos ques comidran ellos o que non
En uuestra mano nos metio nuestro sennor
Tenendos a derecho por amor del criador
Essora dixo el Rey dalma e de coraçon
Aduzen les los cauallos buenos e corredores
Santiguaron las sielas e caualgan a vigor
Los escudos alos cuellos que bien blocados son