Cantar de Mío Cid. Folio 42v

Cometer quiero vn Ruego a myo çid el campeador
Asi lo mande xpistus que sea a so pro
Vuestras fijas uos pido don eluira e donna sol
Que las dedes por mugieres alos yfantes de carrion
Semeiam el casamiento ondrado e con grant pro
Ellos uos las piden e mando uos lo yo
Della e della parte quantos que aqui son
Los mios e los uuestros que sean Rogadores
Dandos las myo çid si uos vala el criador
Non abria fijas de casar Respuso el campeador
Ca non han grant hedand e de dias pequenas son
De grandes nueuas son los yfantes de carrion
Perteneçen pora mis fijas e avn pora meiores
Hyo las engendre amas e criastes las uos
Entre yo y ellas en uuestra merçed somos nos
Afellas en uuestra mano don eluira e donna sol
Dad las a qui quisieredes uos ca yo pagado so
Graçias dixo el Rey a uos e a tod esta
                                                                    cort
Luego se leuantaron los yffantes de carrion
Ban besar las manos al que en ora buena naçio
Camearon las espadas antel Rey don alfonsso
Fablo el Rey don alfonsso commo tan buen sennor
Grado e graçias cid commo tan bueno e primero al criador