Cantar de Mío Cid. Folio 27v

Adelino pora castiella minaya albarfanez
Dexare uos las posadas non las quiero contar
Demando por alfonsso do lo podrie fallar
Fuera el Rey a san fagunt avn poco ha
Tornos a carrion y lo podrie fallar
Alegre fue de aquesto minaya albarfanez
Con esta presenteia adelino pora alla

LXXXI

De missa era exido essora el Rey alfonsso
Afe minaya albarfanez do lega tan apuesto
Finco sos ynoios ante todel pueblo
Alos pies del Rey alfonsso cayo con grand duelo
Besaua le las manos e fablo tan apuesto

LXXXII

Merçed sennor alfonsso por amor del criador
Besaua uos las manos myo çid lidiador
Los pies e las manos commo a tan buen sennor
Quel ayades merçed si uos vala el criador
Echastes le de tierra non ha la uuestra amor
Mager en tierra agena el bien faze lo so
Ganada a xerica e a onda por nombre
Priso a almenar e a muruiedro que es miyor
Assi fizo çebolla e a delant casteion
E penna cadiella que es vna penna fuert
Con aquestas todas de valençia es sennor
Obispo fizo de su mano el buen campeador