Cantar de Mío Cid. Folio 28r

E fizo çinco lides campales e todas las arranco
Grandes son las ganançias quel dio el criador
Feuos aqui las sennas verdad uos digo yo
Çient cauallos gruessos e corredores
De siellas e de frenos todos guarnidos son
Besa uos las manos e que los prendades uos
Razonas por vuestro vassallo e a uos tiene por sennor
Alço la mano diestra el Rey se santigo
De tan fieras ganançias commo a fechas el campeador
Si me vala sant esidro plazme de coraçon
E plazem delas nueuas que faze el campeador
Reçibo estos cauallos quem enbia de don
Mager plogo al Rey mucho peso a garçiordonez
Semeia que en tierra de moros non a biuo omne
Quando assi faze a su guisa el çid campeador
Dixo el Rey al conde dexad essa Razon
Que en todas guisas miior me sirue que uos
Fablaua minaya y a guisa de varon
Merçed uos pide el çid si uos cayesse en sabor
Por su mugier donna ximena e sus fijas amas a dos
Saldrien del monesterio do elle las dexo
E yrien pora valençia al buen campeador
Essora dixo el Rey plaz me de coraçon
Hyo les mandare dar conducho mientra que por mj tierra fueren