Cantar de Mío Cid. Folio 25v

Sonando van sus nueuas todas a todas partes
Mas le vienen a myo çid sabet que nos le van
Metiola en plazo si les viniessen huuyar
Nueue meses complidos sabet sobrella iaz
Quando vino el dezeno ouieron gela a dar
Grandes son los gozos que van por es logar
Quando myo çid ganno a valençia e entro enla çibdad
Los que fueron de pie caualleros se fazen
El oro e la plata quien vos lo podrie contar
Todos eran Ricos quantos que alli ha
Myo çid don Rodrigo la quinta mando tomar
Enel auer monedado .xxx. mill marcos le caen
E los otros aueres quien los podrie contar
Alegre era el campeador con todos los que ha
Quando su senna cabdal sedie en somo del alcaçar

LXXV

Ya folgaua myo çid con todas sus conpannas
Aquel Rey de Seuilla el mandado legaua
Que presa es valençia que non gela enparan
Vino los ver con .xxx. mill de armas
Apres dela verta ouieron la batalla
Arrancolos myo çid el dela luenga barba
Fata dentro en xatiua duro el arrancada
Enel passar de xucar y veriedes barata
Moros en aruenço amidos beuer agua
Aquel Rey de marruecos con tres colpes escapa
Tornado es myo çid con toda esta ganançia
Buena fue la de valençia quando ganaron la casa