Cantar de Mío Cid. Folio 24v

Miedo an en valençia que non saben que se far

LXIX

Sonando van sus nueuas alent parte del mar
Alegre era el çid e todas sus compannas
Que dios le aiudara e fiziera esta arrancada
Dauan sus corredores e fazien las trasnochadas
Legan a guiera e legan a xatiua
Avn mas ayusso a deyna la casa
Cabo del mar tierra de moros firme la quebranta
Ganaron penna cadiella las exidas e las entradas

LXX

Quando el çid campeador ouo penna cadiella
Males pesa en xatiua e dentro en guiera
Non es con Recabdo el dolor de valençia

LXXI

En tierra de moros prendiendo e ganando
E durmiendo los dias e las noches tranochando
En ganar aquelas villas myo çid duro .iij. annos

LXXII

Alos de valençia escarmentados los han
Non osan fueras exir nin con el se aiuntar
Taiaua les las huertas e fazia les grand mal
En cada vno destos annos myo çid les tolio el pan
Mal se aquexan los de valençia que non sabent ques far
De ninguna part que sea non les vinie pan
Nin da cosseio padre a fijo nin fijo a padre
Nin amigo a amigo nos pueden consolar
Mala cueta es sennores aver mingua de pan
Fijos e mugieres ver lo murir de fanbre