Cantar de Mío Cid. Folio 3v

Bien lo sabemos     que el algo a gañado,
quando a tierra de moros entró,     que grant aver a sacado:
non duerme sin sospecha     qui aver trae monedado.
Estas archas     prendamoslas amos,
en logar las metamos     que non sea ventado
Mas dezidnos del Çid,     de que sera pagado
O que ganancia nos dara     por todo aqueste año?»
Respuso Martín Antolínez     a guisa de menbrado:
«Myo Çid querrá,     lo que ssea aguisado;
Pedir vos a poco     por dexar so aver en salvo.
Acógensele omnes     de todas partes meguados,
A menester     seysçientos marcos».
Dixo Rachel e Vidas     «dar gelos hemos de grado».
—«Ya vedes que entra la noch      el Çid es pressurado,
huebos avemos     que nos dedes los marcos».
Dixo Rachel e Vidas     «non se faze assi el mercado
Si non primero prendiendo     e despues dando».
Dixo Martín Antolínez     «yo desso me pago
Amos tred     al Campeador contado,
e nos vos ayudaremos     que assí es aguisado
por aduzir las arcas     e meter las en vuestro salvo,
que non lo sepan     moros nin cristianos».
Dixo Rachel y Vidas     «nos desto nos pagamos
Las archas aduchas,     prendet seyesçientos marcos».