Cantar de Mío Cid. Folio 41v

Lorando delos oios tanto auie el gozo mayor
Asi sabe dar omildança a alfonsso so sennor
De aquesta guisa alos pies le cayo
Tan grand pesar ouo el Rey don alfonsso
Leuantados en pie ya çid campeador
Besad las manos ca los pies no
Si esto non feches non auredes my amor
Hynoios fitos sedie el campeador
Merçed uos pido a uos myo natural sennor
Assi estando dedes me uuestra amor que lo oyan quantos aqui son
Dixo el Rey esto fere dalma e de coraçon
Aqui uos perdono e douos my amor
En todo myo Reyno parte desde oy
Fablo myo çid e dixo merçed yo lo Reçibo alfonsso myo
                                                                                                 sennor
Gradescolo a dios del çielo e despues a uos
E a estas mesnadas que estan a derredor
Hynoios fitos las manos le beso
Leuos en pie e en la bocal saludo
Todos los demas desto auien sabor
Peso a albardiaz e a garciordonez
Fablo myo çid e dixo esta Razon esto gradesco al criador
Quando he la graçia de don alfonsso myo sennor
Valer me a dios de dia e de noch
Fuessedes my huesped si uos plogiesse sennor
Dixo el Rey non es aguisado oy