Cantar de Mío Cid. Folio 40v

Conduchos largos el Rey enbiar mandaua
Alas aguas de taio o las uistas son apareiadas
Con el Rey a tantas buenas conpannas
Los yffantes de carrion mucho alegres andan
Lo vno adebdan e lo otro pagauan
Commo ellos tenien creçer les ya la ganaçia
Quantos quisiessen aueres doro o de plata
El Rey don alfonsso a priessa caualgaua
Cuendes e podestades e muy grandes mesnadas
Los yfantes de carrion lieuan grandes conpannas
Con el Rey van leoneses e mesnadas galizianas
Non son en cuenta sabet las castellanas
Sueltan las Riendas alas vistas se uan adelinnadas

CIV

Dentro en vallençia myo çid el campeador
Non lo detarda pora las vistas se adobo
Tanta gruessa mula e tanto palafre de sazon
Tanta buena arma e tanto buen cauallo coredor
Tanta buena capa e mantos e pelliçones
Chicos e grandes vestidos son de colores
Mynaya albarfanez e aquel pero vermuez
Martin munoz e martin antolinez el burgales de pro
El obispo don ieronimo coranado meior
Aluar aluarez e aluar sauadorez
Munno gustioz el cauallero de pro
Galind garçiaz el que fue de aragon
Estos se adoban por yr con el campeador