Cantar de Mío Cid. Folio 50v

Todas las ganançias a valençia son legadas
Alegre es myo çid con todas sus conpannas
Que ala Raçion caye seys çientos marcos de plata
Los yernos de myo çid quando este auer tomaron
Desta arrancada que lo tenien en so saluo
Cuydaron que en sus dias nunqua serien minguados
Fueron en valençia muy bien arreados
Conduchos a sazones buenas pieles e buenos
                                    mantos
Muchos son alegres myo çid e sus vassallos

CXX

Grant fue el dia la cort del campeador
Despues que esta batalla vençieron e al Rey bucar mato
Alço la mano ala barba se tomo
Grado a xpistus que del mundo es sennor
Quando veo lo que auia sabor
Que lidiaran comigo en campo myos yernos amos a dos
Mandados buenos yran dellos a carrion
Commo son ondrados e aver vos grant pro

CXXI

Sobeianas son las ganançias que todos an ganadas
Lo vno es nuestro lo otro han en saluo
Mando myo çid el que en buen ora nasco
Desta batalla que han arrancado
Que todos prisiessen so derecho contado
E la su quinta non fuesse olbidado
Assi lo fazen todos ca eran acordados
Cayeron le en quinta al çid seyx çientos cauallos